Shea Lacey, einn efnilegasti leikmaður Manchester United, virðist hafa sent JJ Gabriel dulin skilaboð eftir að sá síðarnefndi óskaði eftir að yfirgefa félagið.
Það kom fram í gær að hinn 15 ára gamli Gabriel vilji komast frá United og hefur hann jafnframt fjarlægt allt sem tengist félaginu af Instagram-síðu sinni.
Skömmu síðar birti hinn 19 ára gamli Lacey mynd af sér mæta á Old Trafford og lét hjarta-tjákn (e. emoji) fylgja. Milljónir hafa séð færsluna og samkvæmt enskum miðlum eru margir á því að Lacey sé að skjóta á liðsfélaga sinn.
Gabriel þykir einn allra mest spennandi ungi leikmaður United og hefur verið líkt við Lionel Messi. Hann skoraði þrennu í Evrópukeppni unglingaliða gegn Sabah í síðustu viku og átti að vera í hópi aðalliðsins fyrir leikinn gegn Brighton í deildabikarnum í kvöld. Það hefur hins vegar breyst eftir tíðindin í gær.
United vonast enn til að geta sannfært Gabriel um að vera áfram en mörg af stærstu félögum heims hafa áhuga á honum.
