Gæsluvarðhaldsúrskurður yfir þremur mönnum vegna rannsóknar á andláti Hjörleifs Hauks Guðmundssonar, 65 ára manns frá Þorlákshöfn, sem fannst þungt haldinn í Gufunesi þann 11. mars og lést sama dag, rennur út á morgun.
Sveinn Kristján Rúnarsson, hjá Lögreglunni á Suðurlandi, segist í samtali við DV fastlega gera ráð fyrir því að óskað verði eftir framlengingu á gæsluvarðhaldi mannanna þriggja.
„Henni miðar bara vel, hún er mjög langt komin,“ segir hann við þeirri spurningu hvernig rannsókn málsins miði. Segist hann vonast til þess að málið fari fljótlega frá lögreglu til Héraðssaksóknara, sem tekur ákvörðun um ákæru. Aðspurður segir hann ólíklegt að rannsókn málsins dragist fram eftir sumri.
DV spurði Svein hvort búast megi við að fleiri en sakborningarnir þrír verði ákærð í málinu. „Við erum bara ekki búin að kára þau mál öllsömul, að taka ákvörðun um hvort við breytum einhverju þar í málinu,“ svaraði hann og á þar við að ekki liggi fyrir hverjir fái stöðu sakbornings í málinu hjá lögreglu.
Aðspurður hvort hann telji öruggt að sakborningarnir þrír verði ákærðir segir Sveinn: „Það er ómögulegt að segja um það fyrr en ákæra liggur fyrir. Það væri þá héraðssaksóknara að svara því þegar þar að kemur.“
Samandregið gengur rannsóknin mjög vel, búast má við að henni ljúki innan nokkurra vikna og búast má við því að gæsluvarðhald yfir þremenningunum verði framlengt.
