Hópur unglinga réðst á fjórtán ára dreng með höggum og spörkum í Hamraborginni í síðustu viku. Árásin var tekin upp á myndband en það hefur verið í dreifingu á samfélagsmiðlum. RÚV greindi frá þessu í kvöldfréttum sínum.

Hluti myndbandsins, sem er afar óhugnanlegt, fylgdi með frétt RÚV en þar má sjá unglingana ráðast á drenginn. Faðir drengsins segir að sonur sinn sé ennþá að jafna sig eftir árásina en hann glímir við hausverk og uppköst vegna hennar. Faðirinn telur að það sé mögulegt að ástæða árásinnar sé útlendingaandúð en hann er af erlendum uppruna. Faðirinn segir árásarmennina vera á aldrinum 15 til 17 ára.

Fréttastofa RÚV ræddi við Sigurð Hólm Gunnarsson, forstöðumann á skammtímaheimili fyrir unglinga, en hann segir að ef fólk verður vitni að ofbeldi á almannafæri þá sé það afar mikilvægt að bregðast strax við. „Við sem almennir borgarar þurfum að vera dugleg við að grípa inn í ef við sjáum svona hluti og stoppa þá, ef við treystum okkur til. Hringja alla vega strax í lögregluna og helst stoppa atvikið ef við getum, því að nokkrum mínútum síðar getur það verið of seint,“

Sigurður varð sjálfur vitni að hópárás ungra pilta á sama dreng í fyrra. Þá voru sumir árásarmannana vopnaðir hnúajárnum en árásin átti  sér stað við verslunarkjarna í Grafarvoginum um miðjan dag. Hann segir að það þurfi að skapa einhverja umræðu um þetta í samfélaginu. Foreldrar þurfa að fylgjast með börnunum sínum og ræða um ofbeldið við þau,“ segir hann en mörg börn gera sér ekki grein fyrir alvarleika ofbeldisins.