Nokkur fjöldi vísindamanna og herforingja hefur ýmist horfið eða látið lífið við grunsamlegar aðstæður í Bandaríkjunum undanfarin misseri. Þessir einstaklingar eiga það helst sameiginlegt að hafa haft aðgang að viðkvæmum trúnaðarupplýsingum sem teljast varða þjóðaröryggi. Staðan hefur valdið því að ýmsar samsæriskenningar eru komnar á flug, svo sem að hér sé um að ræða einstaklinga með vitneskju um geimverur eða að óvinaríki Bandaríkjanna hafi banað eða rænt þessum einstaklingum vegna þekkingar þeirra.
Meðal þeirra sem hurfu var Melissa Casias sem hvarf í júní á síðasta ári. Hún starfaði við rannsóknarstöð í Los Alamos í Nýju Mexíkó þar sem fyrsta kjarnorkusprengjan var þróuð. Nú liggur fyrir að Melissa er látin eftir að göngugarpur fann líkamsleifar hennar fyrir tæpri viku síðan, þann 28. maí, í Carson-þjóðskóginum. Dánarorsök hefur ekki verið opinberuð en samkvæmt lögreglunni fannst skammbyssa á vettvangi.
Melissa var 53 ára gömul þegar hún hvarf þann 26. júní árið 2025. Hvarfið þótti strax dularfullt. Hún hafði ekki boðað forföll í vinnu og virðist hafa yfirgefið heimili sitt án þess að taka með sér farsíma eða húslykla. Það sem gerði málið enn skuggalegra er að farsími hennar hafði verið endurstilltur á verksmiðjustillingu (e. factory reset). Eiginmaður hennar, Mark Casias, hefur þó greint frá því að kona hans hafi verið undir miklu álagi þegar hún hvarf. Hjónin unnu saman á rannsóknarstöðinni og morguninn sem Melissa hvarf skutlaði hún manni sínum til vinnu en sagðist þjálf þurfa að mæta á aðra starfstöð. Hún skilaði sér þó aldrei í vinnuna. Lík hennar fannst um 10 kílómetrum frá heimili hennar.
Á annan tug vísindamanna, opinberra starfsmanna og verktaka hjá ríkinu hafa horfið eða verið myrtir frá árinu 2022. Alríkislögreglan FBI er með málið til rannsóknar og kannar meðal annars hvort að tengsl hafi verið milli þessara einstaklinga.
