Samkvæmt skjölunum hafði Epstein um árabil geymt sæði hjá sæðisbankanum California Cryobank og gert ráðstafanir um meðferð sýnanna eftir andlát sitt.
New York Times fjallar um þetta og segir frá samningi sem Epstein undirritaði árið 2016 þar sem fram kom að stjórn yfir sæðissýnunum skyldi færast til dánarbús hans við andlát hans. Sæðisbankinn sjálfur hefði ekki ákvörðunarvald um framtíð sýnanna.
Upplýsingarnar komu fyrst fram opinberlega þegar skjölin voru birt á þessu ári en óljóst er hvort sýnin séu enn til eða hvar þau kunni að vera geymd.
Fyrirtækið CooperCompanies, sem nú á California Cryobank, hefur staðfest að það hafi engin sýni frá Epstein í vörslu sinni. Fyrirtækið hefur ekki viljað veita frekari upplýsingar og fulltrúar dánarbús Epsteins hafa ekki tjáð sig um málið.
Sérfræðingar í lögfræði telja að hugsanlegur ágreiningur um sýnin myndi líklega ráðast af lögum Bandarísku Jómfrúaeyja, þar sem dánarbú Epsteins er skráð.
Í frétt New York Times kemur einnig fram að málið hafi jafnframt vakið siðferðilegar spurningar um hvort frjósemisstofur eigi að taka við eða nota erfðaefni einstaklinga sem hafa verið dæmdir fyrir kynferðisbrot.
Fram kemur í umfjöllun New York Times að Epstein hafi haft metnað til að dreifa erfðaefni sínu víða. Samkvæmt frétt blaðsins hafði hann rætt hugmyndir um að gera fjölda kvenna barnshafandi á búgarði sínum í Nýju-Mexíkó.
Í tölvupóstum sem birtust meðal nýlegra skjala kemur einnig fram að Epstein hafi sýnt kynbótastefnu, svokallaðri eugenics, verulegan áhuga. Í einum tölvupósti lýsti hann yfir áhuga á klónun og ræddi jafnframt um siðferðileg álitaefni sem tengjast slíkri tækni.
