Við lifum á tímum þar sem sífellt meiri áhersla er á að lifa lengi. En hvað er það sem hefur áhrif á ævilengd okkar? Hreyfing í ákveðinn fjölda skipta í viku hverri? Prótínríkur matur? Sólarljós og köld böð?

Niðurstöður nýrrar rannsóknar benda til að fyrrnefnd atriði séu ekki afgerandi fyrir hversu lengi við lifum. Það er svolítið annað.

Það er oft sagt að það slíti kvenlíkamanum að eignast börn. Og þeim mun fleiri börn, þeim mun meira álag á líkamann. En niðurstöður finnskrar rannsóknar á tvíburum benda til annars.

Rannsóknin var gerð af vísindamönnum við Háskólann í Helsinki og Minerva Foundation Institute for Medical Research og náði til tæplega 15.000 kvenna.

Konurnar fylltu út spurningaskema árið 1975 og síðan fylgdust vísindamenn með lífshlaupi þeirra. Markmiðið var að rannsaka hvaða áhrif barneignasaga kvennanna, það er hversu mörg börn hver og ein eignaðist og hvenær á lífsleiðinni hún eignaðist þau, tengist líffræðilegu öldrunarferli og ævilengd.

Niðurstöðurnar koma eflaust einhverjum á óvart því samkvæmt þeim, þá lifðu konur, sem eignuðust tvö eða þrjú börn, lengst en þær sem eignuðust ekki barn eða fleiri en fjögur börn lifðu almennt skemur.

En áður en þú ferð að hugleiða hvort þú eigir að eignast fleiri börn í skyndi eða hætta við að eignast fleiri, þá skaltu staldra aðeins við!

Rannsóknin sýnir samhengi en er ekki sönnun fyrir að fjöldi barna hafi áhrif á hvort ævilengdin verði skemmri eða lengri.