Geragos ræddi málið á ráðstefnunni CrimeCon 2026 í Las Vegas um helgina. Þar sagði hann að skortur á myndbandsupptökum úr réttarsalnum hefði haft veruleg áhrif á hvernig almenningur skynjaði skjólstæðinga hans.
„Það voru engar myndavélar í réttarsalnum. Ég hef alltaf sagt að það versta sem ég gerði í máli Scott Petersons, og ég myndi segja það sama um Michael Jackson, var að það voru engar myndavélar í réttarsalnum,“ sagði Geragos.
Að hans sögn fékk almenningur upplýsingar um málin að mestu í gegnum fjölmiðlaumfjöllun og umræður utan dómshússins. Það hafi skapað skakka mynd af sakborningunum.
Scott Peterson var árið 2004 sakfelldur fyrir morðið á eiginkonu sinni, Laci Peterson, og ófæddu barni þeirra, Conner. Hann var upphaflega dæmdur til dauða, en síðar var dómnum breytt í lífstíðarfangelsi án möguleika á reynslulausn.
Sjá einnig: Jólamorðið – Af hverju myrti hann Laci?
Michael Jackson var hins vegar sýknaður árið 2005 af ákærum um kynferðisbrot gegn 13 ára dreng.
Geragos heldur því enn fram að Peterson sé saklaus. Hann lét þau orð falla á ráðstefnunni að fangelsisvist fyrrverandi skjólstæðings síns væri eitt af því sem héldi fyrir honum vöku á nóttunni.
„Fólk spyr mig oft hvernig ég geti sofið á nóttunni miðað við það sem ég geri. Það sem heldur mér vakandi er þegar ég tel að ég sé að verja saklausan skjólstæðing. Þá missi ég svefninn,“ sagði hann.
Ummælin komu fram í aðdraganda nýrrar heimildarmyndar frá A&E um Peterson-málið sem verður frumsýnd í júlí.
Mál Petersons hefur verið reglulega verið í umræðunni vestanhafs og sérstaklega eftir að samtökin Innocence Project í Los Angeles ákváðu að taka það til skoðunar árið 2024.
Samtökin halda því fram að lögreglan í Modesto hafi ekki rannsakað allar mögulegar vísbendingar, þar á meðal lýsingar sjónarvotta og innbrot sem átti sér stað nálægt heimili Peterson-hjónanna. Einnig hafi ákveðin DNA-gögn aldrei verið rannsökuð.
