Mál húðsjúkdómalæknisins Yue „Emily“ Yu vakti mikla athygli árið 2023 eftir að hún var ákærð fyrir að eitra fyrir eiginmanni sínum með stíflueyði.
Samkvæmt ákæru átti Emily að hafa í þrígang blandað stíflueyði í te sem hún færði eiginmanni sínum. Eiginmaðurinn, Jack Chen, byrjaði að gruna konu sína um græsku eftir að hann fékk magasár og hafði á sama tíma tekið eftir því að teið hans bragðaðist öðruvísi en áður. Kom hann því fyrir eftirlitsmyndavélum í eldhúsinu og stóð Emily þannig að verki.
Á upptöku mátti sjá Emily, sem þá var 45 ára, blanda stífueyðinum Dreno í teið.
Sjá einnig: Grunuð um að hafa sett stíflueyði í te eiginmannsins
Nú hafa vendingar átt sér stað í málinu, en því var á föstudaginn vísað frá dómi eftir að í ljós kom að ákæruvaldið hafði leynt mikilvægum upplýsingum.
Að sögn verjenda Emily er hún fegin að málinu sé lokið.
„Hún vill bara halda lífi sínu áfram. Hún hefur ekki getað starfað sem læknir síðan málið kom upp og það hefur verið henni þungbært og auk þess hefur henni verið meinað að hitta börn sín. Við erum þakklát að dómari gaumgæfði ferlið á bak við þessa ákæru og viðurkenndi að málinu væri verulega ábótavant. Emily Yu hefði aldrei átt að vera ákærð. Hún hefur frá upphafi haldið því fram að hún hafi ekki gert nokkuð rangt og treyst á réttláta og sanngjarna málsmeðferð.“
Saksóknarinn Kimberly Edds segir þó að málinu sé ekki lokið. Ákæra verði gefin út að nýju enda mikilvægt að fyrrverandi eiginmaður Emily njóti sannmælis.
„Við trúum á styrk sönnunargagnanna í þessu máli og á fagleg vinnubrögð saksóknara okkar,“ sagði hún. „Við munum halda áfram að reka þetta mál fyrir dómstólum í leit okkar að réttlæti fyrir einstakling sem var markvisst eitrað fyrir af eiginkonu sinni, heilbrigðisstarfsmanni sem var staðráðinn í að valda honum kvölum.“
Emily hefur haldið því fram að eiginmaður hennar hafi haft hana fyrir rangri sök til að ná höggi á henni í forsjár- og skilnaðardeilum þeirra. Myndbandið sýni hana hella stíflueyði í tebolla en það eigi sér eðlilega skýringu. Hún hafi verið að útbúa gildru fyrir maura að beiðni eiginmannsins. Jack hafi svo komið inn í eldhúsið og fengið sér sopa úr bollanum, þrátt fyrir að vita að í honum var stíflueyðir.
Sjá einnig: Eiginkonan segist hafa gengið í ótrúlega gildru í miðjum skilnaði
