Fjöltengi eru líklega til á öllum heimilum og eru oft notuð sem einföld lausn þegar það er ekki nóg af innstungum. Þetta gerir lífið auðveldara en um leið felur þetta ákveðna hættu í sér sem mörgum yfirsést.

Margir sérfræðingar segja að röng notkun fjöltengja geti orsakað upphitun og í versta tilfelli eldsvoða.

Vandinn kemur aðallega upp þegar fleiri tæki, sem þurfa mikið rafmagn, eru í sambandi við fjöltengið en það þolir.

Rafmagnsfrek tæki

Grundvallarráðlegging er að tæki, sem nota mikið rafmagn, séu tengd beint í innstungu. Meðal slíkra tækja eru hitarar og loftkælingar og þau á aldrei að tengja við fjöltengi.

Það er líka rétt að vera á varðbergi í eldhúsinu. Örbylgjuofnar, brauðristar og kaffivélar geta notað mikið rafmagn, meira en fjöltengi geta borið.

Ísskápar og frystar eru einnig meðal þeirra tækja sem ættu að vera tengd beint við innstungu því þjöppurnar í þeim vinna stanslaust.

Algeng mistök

Ein algengustu mistökin sem fólk gerir er að tengja fjöltengi saman. Þetta eykur hættuna á ofálagi og getur valdið tjóni á bæði leiðslum og tækjunum sem eru tengd við fjöltengin.

Hárblásarar og önnur hitagefandi tæki eru sérstaklega hættuleg þegar þau eru notuð í röku rými. Blanda mikils hita og raka getur aukið hættuna á að fá rafstuð eða að tækin ofhitni.

Þessi tæki eru fjöltengi ætluð fyrir

Fjöltengi eru hönnuð fyrir tæki sem nota lítið rafmagn. Þetta á til dæmis við umhleðslutæki, lampa og tölvur.

Þegar fjöltengi eru notuð á réttan hátt, þá eru þau örugg og góð lausn.

Það á alltaf að taka merki um ofálag alvarlega. Fjöltengi, sem virðist heitt eða brunalykt kemur frá, á alltaf að taka samstundis úr notkun.