Hrollvekjandi mál er nú komið upp í San Fransisco en þar ætlaði auðugur leigusali að losna við leigjanda sinn – hvað sem það kostaði.

Leigusalinn, Phillippe Chagniot, er tannlæknir á eftirlaunum og ætlaði sér að selja fasteign fjölskyldunnar, sem er metin á um 164 milljónir. Til þess að geta selt eignina þurfti hann þó að losna við leigjandann. Samkvæmt húsaleigulögum í San Fransisco þurfa leigusalar að bjóða leigjendum peningagreiðslu þegar bera á þá út þrátt fyrir gildan leigusamning. Stundum hlaupa slíkar greiðslur á milljónum. Leigjandinn, hinn 58 ára gamli Eric Bigone, þekkti rétt sinn og hafði ráðið lögmann til að gæta hagsmuna sinna í samningaviðræðunum. Deilur leigusalans og leigjandans voru hatrammar og örvænting Chagniot var töluverð eftir að eiginkona hans greindist með krabbamein. Hann vildi söluandvirði eignarinnar og hann vildi það strax.

Það fór á endanum svo að fyrrum tannlæknirinn mætti glímuklæddur að eigninni snemma morguns þar sem leigjandinn, Eric Bigone, var að leggja af stað í vinnuna. Chagniot kveikti í bíl fyrir utan í von um að lokka leigjandann út. Síðan falldi hann sig.

Þegar Bigone kom út læddist Chagniot aftan að honum, skaut hann í höfuðið og hjólaði svo af vettvangi eins og ekkert hefði í skorist.