Kona er alvarlega slösuð eftir hrottalega nauðgun og ofbeldi sem hún varð fyrir í almenningsgarði í miðborg Stokkhólms aðfaranótt mánudags. Málið er rannsakað sem morðtilraun og gróf nauðgun að sögn talskonu lögreglunnar.

Aftonbladet skýrir frá þessu.

Árásin átti sér stað í Tantolunden sem er á Södermalm. Lögreglunni var tilkynnt um málið um klukkan 2.

Aftonbladet hefur eftir talskonu lögreglunnar að konan sé alvarlega slösuð og hafi verið flutt á sjúkrahús með sjúkrabíl. Mikil leit hefur verið gerð að ofbeldismanninum sem hvarf gangandi á brott.

Konan var á gangi þegar maðurinn réðst á hana. Lögreglan hefur notað hunda, þyrlu og lögreglumenn á gangi og í bílum við leitina að honum. Einnig er verið að fara yfir upptökur úr eftirlitsmyndavélum.