Hópur af nemendum og kennurum á vegum Flensborgarskólans í Hafnarfirði snéri við vegna COVID-19 veirunnar á Luton-flugvellinum í London í gær. RÚV greinir frá þessu.

Hópurinn samanstóð af sex nemendum og tveimur kennurum en hópurinn var á leið til Ítalíu til að taka þátt í alþjóðlegu verkefni á vegum Erasmus. Hólmríður Sigþórsdóttir, líffræðikennari og fararstjóri hópsins, sagði í samtali við RÚV að í Leifsstöð hafi það verið ákveðið, í samráði við Embætti landlæknis, Utanríkisráðuneyti og Erasmus, að halda af stað í ferðina.

Forsvarsmenn verkefnisins á Ítalíu ákváðu hins vegar að aflýsa verkefninu á meðan hópurinn var í loftinu á leið til Bretlands. Hópurinn þurfti því að snúa við til Íslands.

Hólmfríður gerir ráð fyrir því að hópurinn komi til Íslands í dag. Hún segir það vera svekkjandi að þetta sé raunin en hópurinn sýnir þessum aðstæðum þó skilning. Óljóst er hvort og hvernig samgangi á milli landanna verður háttað og því er framhald verkefnisins í óvissu.

Þegar þetta er skrifað eru 215 smitaðir af COVID-19 veirunni á Ítalíu og af þeim hafa 4 látist en 2 hafa náð sér. Hvergi eru fleiri smitaðir utan Asíu en í Ítalíu.