Þetta sagði Ted Wheeler, borgarstjóri í Portland, í samtali við CNN og hvatti Donald Trump, forseta, til að kalla lögreglusveitir sínar frá borginni. Trump stærir sig af því að lögreglumennirnir hafi á skömmum tíma náð „framúrskarandi árangri“ sem sé þveröfugt miðað við árangur heimamanna sem Trump segir vera hrædda við að grípa til aðgerða.
Demókratar eru ekki sáttir við þessa aðgerðir forsetans og segja hann vera að reyna að nota mótmælin sér til framdráttar í kosningabaráttunni. Trump hefur heitið því að taka fast á mótmælendum, sem mótmæla kynþáttamisrétti og drápum lögreglunnar á svörtu fólki, með því að senda alríkslögreglumenn til margar borga þar sem hann telur að lögreglan hafi ekki tekið nægilega fast á málum. Fram að þessu hefur hann bent á New York, Chicago, Philadelphia, Detroit, Baltimore og Oakland sem hugsanlega viðkomustaði alríkislögreglumanna. Svo vill til að í öllum þessum borgum eru borgarstjórarnir úr röðum demókrata.
Umræddir alríkislögreglumenn heyra undir þjóðaröryggisráðuneytið og koma þeir úr röðum US Marshals Service, sem er elsta alríkislögregludeild landsins, og úr toll- og landamæralögreglunni. Markið þessarar nýju löggæslusveitar er að sögn að vernda styttur og opinberar byggingar sem mótmælendur hafa látið reiði sína bitna á eftir drápið á George Floyd. Ekki þarf heimild frá staðaryfirvöldum til að beita alríkislögreglumönnunum.
Meðlimir löggæslusveitarinnar voru í síðustu viku sakaðir um að hafa farið um Portland óeinkennisklæddir og að hafa handtekið mótmælendur víðs fjarri þeim byggingum sem þeir áttu að vera að gæta. Einn lögreglumannanna er sakaður um að hafa skotið mótmælanda í höfuðið með vopni sem er þó ekki banvænt.
En hvort þessi aðferðafræði mun afla Trump meiri stuðnings á eftir að koma í ljós en samkvæmt nýrri skoðanakönnun Wall Street Journal telur vaxandi hluti kjósenda að svartir og fólk af latneskum uppruna verði fyrir mismunun af hálfu lögreglunnar. 56% aðspurðra töldu að kynþáttahyggja viðgangist í bandarísku samfélagi.
