Tveir piltar, 15 og 16 ára, hafa verið handteknir í Svíþjóð vegna gruns um að hafa framið morð í Norrköping. Drengirnir eru einnig grunaðir um að hafa framið morð gegn greiðslu í Osló.

Málið er það nýjasta í röð mála af þessu tagi í Svíþjóð þar sem börn og unglingar hafa verið fengin af glæpasamtökum til að fremja óhæfuverk þar á meðal morð. Börnunum er oft heitið greiðslu sem í mörgum tilfellum er ekki staðið við en einnig eru þau beitt kúgunum til að þau láti verða af því að fremja ódæðin. Oftast er lagt fyrir þau að myrða meðlimi annarra glæpagengja. Yfirvöld hafa brugðist við meðal annars með áformum um að lækka sakhæfisaldurinn.

Í máli umræddra tveggja drengja, sem SVT greinir frá, var maður á þrítugsaldri skotinn utandyra í Norrköping síðasta fimmtudagskvöld. Hann lést af sárum sínum í gærkvöldi. Piltarnir voru raunar handteknir áður en maðurinn lést.

Yngri pilturinn hefur játað aðild sína að málinu en ber við sjálfsvörn. Piltarnir hafa báðir verið úrskurðaðir í gæsluvarðhald.

Þeir eru einnig grunaðir um að hafa orðið öðrum manni að bana í Osló í síðustu viku. Sá maður átti sér sögu um þátttöku í glæpastarfsemi. Norsk yfirvöld grunar að um leigumorð hafi verið að ræða og vinna nú norska og sænska lögreglan saman að rannsókn málsins.

Sænsk yfirvöld vilja á þessu stigi ekki staðfesta að drengirnir séu grunaðir um tengsl við glæpasamtök og heldur ekki að maðurinn, sem þeir eru grunaðir um að myrða í Norrköping hafi verið grunaður um slíkt.