Fimmtíu og sjö ára kona í borginni Baton Rouge, í Lousiana-ríki í BNA, hefur verið sakfelld fyrir manndráp vegna dauða barnabarns síns, fjögurra ára stúlku.
Sakborningurinn heitir Roxanne Record. Dótturdóttir hennar, hin fjögurra ára gamla China Record, hafði stolist til að fá sér sopa úr viskíflösku á heimilinu. Amman, Roxanne, refsaði stúlkunni með því að neyða hana til að klára úr flöskunni, sem var hálffull. Harmleikurinn átti sér stað árið 2022. Barnið var meðvitundarlaust er viðbragðsaðilar komu á vettvang og lést skömmu síðar á sjúkrahúsi.
Roxanne var handtekin og játaði samstundis sök. Sagðist hún bera fulla ábyrgð á dauða barnsins og að refsingin hefði farið úr böndunum.
Hún var sakfelld fyrir manndráp þann 2. maí síðastliðinn.
Móðir barnsins, Kadjah Record, var stödd á heimilinu þegar dóttir hennar lést. Hún hefur líka verið ákærð fyrir morð vegna málsins og á að koma fyrir dómstól þann 29. júní næstkomandi.
Refsing yfir Roxanne Record verður ákveðin þann 10. ágúst næstkomandi. Á hún yfir höfði sér allt að 40 ára fangelsi.
Sjá nánar um málið hér.
