Ljósmyndarinn Þröstur Guðlaugsson er 71 árs gamall með nýrnabilun á lokastigi. Sökum veikindanna þarf hann reglulega að mæta á Landspítalann í blóðskilun, eða fimm sinnum í viku. Sem stendur notast hann við bifreið sem hann er með að láni, en það er honum dýrt og auk þess er erfitt að finna bílstæði við Landspítalann. Að lokinni meðferð á hann stundum erfitt með að keyra heim því fjögurra tíma blóðskilunin tekur á líkamann.

Hann langar því að kaupa sér rafknúið hlaupahjól og safnar hann nú fyrir kaupunum inni á fjármögnunarsíðunni Karolina Fund.

Þar skrifar Þröstur:

„Ég er sjötíu og eins árs með nýrnabilun á lokastigi og er í reglulegri blóðskilun á Landspítalanum. Þarf að komast í meðferð fimm sinnum í viku.

Ég er með bíl í láni, en það er dýrt og mjög erfitt að finna bílastæði við Landspítalann og stundum get ég ekki keyrt heim eftir meðferð því það tekur á líkamann að vera í blóðskilun í fjóra klukkutíma. Þá þarf ég að ganga heim sem er ekki mjög löng leið en erfið stundum.

Mig langar því að safna fyrir rafknúnu hlaupahjóli sem myndi auðvelda mér þessar ferðir og vera líka umhverfisvænni og heilnæmari ferðamáti. Notað eða nýtt skiptir mig ekki máli.“

Hann segist hafa ákveðið að hefja þessa söfnun svo hann þurfi hvorki að nota bíl né akstursþjónustu borgarinnar. Þannig geti hann haldið „reisn og sjálfstæði eins lengi og mögulegt er síðustu ár ævi minnar“

Áhugasamir geta lagt söfnuninni lið hér.