Helgunum fylgir stundum áfengisneysla. Kannski eitt glas eða bjór til að slaka á eftir erfiða viku og stundum fer þetta kannski aðeins lenga og mikið er drukkið. En sjaldnast finnst fólki þetta vera eitthvað sem skilur einhver spor eftir sig.
ScienceDaily segir að ný rannsókn vísindamanna við University of Southern California Keck Medicine sýni að það geti meira að segja haft mikil áhrif á líkamann að drekka mikið áfengi í einu, þótt það gerist sjaldan.
Rannsóknin, sem hefur verið birt í vísindaritinu Clinical Gastroenterology and Hepatology, bendir til að tengsl séu á milli alvarlegs tjóns á lifrinni og þess aðd rekka mikið áfengi öðru hvoru.
Vísindamennirnir beindu sjónum sínum að fitulifur en hún tengist oft ofþyngd, sykursýki og álíka sjúkdómum.
Þrátt fyrir að sjúkdómurinn sé ekki afleiðing áfengisneyslu, þá benda niðurstöður rannsóknarinnar til að drykkjumynstrið geti gert sjúkdóminn verri.
8.000 fullorðnir tóku þátt í rannsókninni sem náði yfir tímabilið frá 2017 til 2023.
Niðurstöðurnar sýna að fólk, sem drekkur mikið í einu, meira að segja bara einu sinni í mánuði, er mun líklegra til að hljóta varanleg mein á lifrinni en þeir sem dreifa áfengisneyslunni.
