Í kjölfar árásar Japana á Perluhöfn þann 7. desember 1941 drógust Bandaríkin að fullu inn í síðari heimsstyrjöldina. Í kjölfar árásarinnar, eða þann 19. febrúar 1942, gaf Franklin D. Roosevelt, þáverandi Bandaríkjaforseti, út tilskipun um að allir Bandaríkjamenn af japönskum ættum skyldu fluttir í sérstakar búðir (fangabúðir) þar sem þeir skyldu dvelja um óákveðinn tíma. Meðal þessara Bandaríkjamanna var Koda-fjölskyldan í Central Valley í Kaliforníu. Þegar fjölskyldan var flutt á brott veitti hún öðrum umboð til að annast búreksturinn í fjarveru sinni. En þegar fjölskyldan sneri aftur var búið að selja landareignina, mylluna, þurrkunarbúnað og fleira til bænda í nágrenninu. Öll tilheyrandi skjöl höfðu verið útfyllt og öllum ákvæðum um þau fylgt þrátt fyrir að allir hafi væntanlega gert sér grein fyrir að viðskiptin voru ekki alveg lögleg. Koda-fjölskyldan var ekki sú eina sem lenti í þessu.

Á síðasta ári stakk þessi dökka fortíð höfðinu upp á nýjan leik. Það var þegar Hæstiréttur Bandaríkjanna féllst á útþynnta útgáfu af tilskipun Donald Trump, forseta, um bann við komum fólks frá múslímaríkjum til Bandaríkjanna. Í niðurstöðu sinni fordæmdi dómstóllinn eigin ákvörðun frá 1944 á tilskipun Roosevelt um flutning japönsku Bandaríkjamannanna í fangabúðir í kjölfar árásarinnar á Perluhöfn.

„Að neyða bandaríska ríkisborgara til að flytja í fangabúðir eingöngu vegna kynþáttar þeirra er hlutlægt séð ólöglegt og ekki innan valdsviðs forsetans.“

Skrifaði John Roberts, Hæstaréttardómari, í dómsorði.

Fjórir af níu dómurum réttarins greiddu atkvæði á móti niðurstöðunni. Einn þeirra, Sonia Sotomayor, sagði í áliti sínu að það væri varasamt að Hæstiréttur skipti vafasamri niðurstöðu út með annarri vafasamri. Hún sagði að með því að samþykkja í blindni stefnu, sem mismunar fólki, undir yfirskyni þjóðaröryggis noti hæstiréttur sömu hættulegu rök og áður og vísaði þar í dóminn frá 1944. Tæplega 120.000 Bandaríkjamenn af japönskum ættum, aðallega frá vesturströndinni, voru sendir í fangabúðir. Þær voru staðsettar víða um land, til dæmis í Colorado, Arizona, Wyoming, Utah og Arkansas. Kanadamenn fylgdu fljótlega í fótspor Bandaríkjamanna og fluttu 21.000 Kanadamenn af japönskum ættum í fangabúðir og það sama var gert í Mexíkó.

Fangabúðunum var lokað að stríði loknu, þeim síðustu í árslok 1945. Margir fanganna misstu allt sitt á meðan þeir voru í fangabúðunum því eigur þeirra voru seldar á meðan.