Sigurður Þ. Ragnarsson, veðurfræðingur, segir að enn þurfum við að bíða í um tvær vikur eftir að sumarið hefjist fyrir alvöru. 21. maí, eða þar um kring sé dagurinn sem veðrið breytist til hins betra. Hann segir kuldakastið sem nú standi yfir muni hins vegar gefa sig strax eftir helgi.
„Þetta er óskaplegt eins og þetta er og ömurlegt að þetta skuli byrja svona. Menn muna nú eftir hitabylgjunni sem var í maí í fyrra og lengdi sumarið okkar um hálfan mánuð í það minnsta,“ segir Sigurður, eða Siggi stormur eins og hann er gjarnan kallaður. „Þetta er bölvanleg tíð, sérstaklega fyrir norðan og austan. Þetta er hart vor.“
Eins og flestir vita hefur verið næturfrost hér sunnan og vestanlands og hitinn á daginn varla farið yfir 5 gráðurnar. Norðan og austanlands hefur snjóað.
Þegar litið er á gögnin sést að í 1500 metra hæð er 12 til 14 stiga frost sem er vetrarstaða að sögn Sigurðar. Hann segir tvennt að valda þessu. Lægð sem er suðaustur af landinu sem dælir norðanátt yfir landið og svo hæðarhryggur sem sendir okkur heimskautaloft úr norðri. „Við sitjum í súpunni,“ segir hann.
Sigurður segir það fremur fátítt að við séum með svona lágar hitatölur komin þetta langt inn í maí.
„Maí er alveg þekktur fyrir kuldaköst. En það sem mér finnst vera óvanalegt í þessu er hversu mikill kuldinn er í 1500 metra hæð miðað við að það er kominn 7. maí. Maður var farinn að búast við að það yrði jafn vel orðið sumarlegt um að litast. En við erum ekki stödd þar,“ segir hann.
Í lok helgarinnar gefur þetta hins vegar eftir en það þýðir ekki að sumarið sé komið.
„Þessi ósköp sem nú eru yfir landinu eru að hörfa á sunnudaginn og við fáum strax mildara veður á öllu landinu. Síðan má reikna við að það verði brokkkengt. Það verður sæmilegur hiti, ekki svona kalt eins og er núna,“ segir hann. Kannski 5 til 10 stiga hiti og væta annars lagið.
Laugardaginn 16. maí er kosið til sveitarstjórna og veðrið getur haft áhrif á kjörsókn. Sigurður segir að það megi búast við einhverri vætu á kjördag.
„Það verður hæglætisveður á kjördag. En það má búast við rigningu, sérstaklega vestanlands,“ segir hann.
Á þessu brokkgenga tímabili munu koma góðir dagar. Það skipti hins vegar mestu máli að það verði ekki mjög vindasamt. Því á meðan hitinn er ekki meiri en hann er þá verður bölvanlega kalt í vindi.
Hins vegar séu engar stórlægðir eða hamfaraveður í kortunum. Það er búið í bili.
„Öll læti eru búin. Lægðirnar hafa ekki fóður í nein læti,“ segir hann. „En þessi norðanátt sem er yfir landinu er mjög þreytandi fyrir strandveiðisjómenn. Það er stífur vindur vestast á landinu og hvítnar í báru. Ég veit að strandveiðisjómenn hafa verið að sigla í land vegna veðurs án þess að hafa náð skammtinum. Þá er ekki orðið vinnandi um borð.“
Þykkt loftmassans er á meðal þess sem veðurfræðingar skoða. Hann er mjög þunnur núna. Gastegundir dragast saman í kulda og þenjast út í hita. Lofthjúpurinn þykknar þegar hlýnar og við erum að fara fá yfir okkur þykkara og hlýrra loft. Þá eru minni líkur á að við lendum aftur í svona hreti eins og er að ganga yfir landið þessa dagana.
Sigurður segir að allt sé þetta leikur að reikningum og fyrirvarar gefnir en eins og staðan er núna þá komi sumarið 21. maí, eða þar um bil. Þá megum við eiga von á að sjá hitatölur frá 15 til 18 stig og sólskin, einkum norðan og austanlands en hugsanlega víðar.
Þá kemur hæðarsvæði sem virðist ætla að ná árangri í því að ýta að okkur hlýju lofti.
„Sú hæð mun starta alvöru sumartíð,“ segir Sigurður.
