Vilhjálmur Birgisson, formaður Verkalýðsfélags Akraness og Starfsgreinasambandsins, segir að rétt sé að senda Sjálfstæðisflokkinn og Framsóknarflokkinn í langt frí eftir framkomu þeirra í hvalveiðimálinu. Ekki þurfi að hafa áhyggjur af Vinstri grænum í ljósi fylgis þeirra. Er Vilhjálmur bálreiður yfir ákvörðun Bjarkeyjar Gunnarsdóttur matvælaráðherra í gær.
„Annað árið í röð stórskaða stjórnvöld hagsmuni minna félagsmanna, sveitarfélagsins sem og möguleika þjóðarbúsins á því að skapa alvöru gjaldeyristekjur með geðræðislegum vinnubrögðum við veitingu á leyfi til hvalveiða,“ segir Vilhjálmur í færslu á samfélagsmiðlum. En hafa ber í huga að flestir hvalveiðimenn eru meðlimir í verkalýðsfélagi Vilhjálms.
Beinir hann einkum spjótum sínum að þingmönnum Sjálfstæðisflokksins og Framsóknarflokksins sem hafi mætt með „kassann út“ á fund sem verkalýðsfélagið hélt á Akranesi á síðasta ári þegar Svandís Svavarsdóttir meinaði Hval hf að sigla á veiðar, daginn fyrir vertíð. Segir Vilhjálmur það „grátbroslegt“ að rifja upp hvernig þingmennirnir töluðu þá.
Nefnir hann að hann hafi þá sagt að langlíklegast væri að ákvörðunin skapaði ríkinu skaðabótaskyldu. Umboðsmaður alþingis hafi svo úrskurðað ákvörðunina ólöglega.
„Ég sagði í mínu erindi að bæði Framsóknarflokkurinn og Sjálfstæðisflokkurinn gætu ekki horft aðgerðalausir á þessa ólöglegu ákvörðun matvælaráðuneytisins enda væri umræddur ráðherra í umboði samstarfsflokkanna og ábyrgð þeirra væri gríðarlega mikil. Ég spurði hvort Framsóknarflokkurinn og Sjálfstæðisflokkurinn ætluðu að láta skattgreiðendur greiða milljarða í skaðabætur í ljósi þess að flokkarnir vissu að um ólöglega ákvörðun var að ræða,“ segir Vilhjálmur. „Það vantaði ekki „kjaftinn“ á þingmenn kjördæmisins á fundinum í fyrra en því miður var og er engin innistæða fyrir öllum þeim stóru orðum sem þeir létu falla á þeim fundi um að þessi ólöglega ákvörðun myndi ekki mega standa óbreytt.“
Nú sé verið að eyðileggja aðra vertíð með „klækjum og seinagangi.“ Hins vegar standi Sjálfstæðisflokkurinn ekki vörð um atvinnufrelsi einstaklinga og fyrirtækja og þögn Framsóknarflokksins sé ærandi. „Ég er reyndar hættur að átta mig á fyrir hvað sá flokkur stendur,“ segir Vilhjálmur um Framsóknarflokkinn.
Segir Vilhjálmur „ömurlegt“ að heyra Bjarna Benediktsson forsætisráðherra og Sigurð Inga Jóhannsson fjármálaráðherra nánast leggja blessun yfir ákvörðun Bjarkeyjar í fréttum í gær. Enginn ráðherra hafi gert athugasemd við hana.
„Ég held að fyrir okkur Akurnesinga og nærsveitunga sé orðið ljóst að mikilvægt sé að gefa Framsóknarflokknum og Sjálfstæðisflokknum langt og gott frí en við munum væntanlega ekki þurfa að hafa áhyggjur af skemmdarverkum Vinstri grænna á komandi árum enda mælist flokkurinn eins og Egils Gull léttöl,“ segir Vilhjálmur að lokum.
