Grænlendingurinn Jørgen Boassen, sem komst í heimsfréttirnar fyrir stuðning sinn við Donald Trump Bandaríkjaforseta og studdi tilraunir hans til að innlima Grænland í Bandaríkin, er flúinn úr landi. Hann missti bæði konuna og lífsviðurværið á Grænlandi og var ekki vært þar.
Greint er frá þessu í danska blaðinu Jyllands Posten.
Boassen, sem er 52 ára múrari, hefur ítrekað komist í fréttir bæði á Grænlandi og víðar fyrir uppátæki sín í tengslum við stuðning við Trump og aðra öfga hægrimenn í Bandaríkjunum. Hann var til að mynda leiðsögumaður Donald Trump yngri og Charlie Kirk þegar þeir heimsóttu eyjuna í janúar árið 2025.
Þá skipulagði hann einnig hundasleðakeppni fyrir heimsókn varaforsetans J.D. Vance í mars árið 2025. Dagblaðið New York Times lýsti þá Boassen sem “aðdáanda Trump númer 1 í Grænlandi.”
Eðlilega hefur þessi hegðun farið illa í marga Grænlendinga, sem óttast innlimun eða jafn vel hernaðarárás Bandaríkjamanna á eyjuna eftir sífelldar hótanir Trump. Yfirgnæfandi meirihluti Grænlendinga er á móti Trump og yfirtöku Bandaríkjanna á eyjunni.
Eins og sagt er í Jyllands Posten hefur Boassen nú þurft að flýja land þar sem honum er ekki lengur vært á Grænlandi. Hann missti bæði eiginkonuna og lífsviðurværið sitt þar sem fólk vildi ekki stunda viðskipti við hann.
Áður hefur verið greint frá því að Boassen hafi fengið morðhótanir fyrir daður sitt við Trump og aðra hægri öfgamenn. Þá hefur hann einnig orðið fyrir líkamsárásum, til að mynda á veitingastöðum.
Þegar veist hefur verið að Boassen hefur hann oft svarað í sömu mynt. Hefur hann meðal annars verið settur í bann á sumum veitingastöðum, hótelum og sundlaugum.
