Eldum rétt og Ísfugl gerðu nýverið með sér samning um að héðan í frá verði allur ferskur kjúklingur í matarpökkum Eldum rétt frá Ísfugli. Kemur þetta fram í fréttatilkynningu.
„Við höfum átt í virkilega farsælu samstarfi og með aukinni framleiðslugetu hjá Ísfugli voru loksins forsendur fyrir því að auka samstarfið enn frekar. Þar með er allur ferskur kjúklingur í okkar réttum frá íslenskum bændum,“ segir Oddur Örnólfsson framkvæmdastjóri Eldum rétt.
„Eldum rétt og Ísfugl eru fyrirtæki sem deila grunngildum hvað varðar gæði og góða þjónustu og við erum virkilega stolt af því að geta aukið okkar samstarf og haldið áfram að sjá það vaxa og dafna,” segir Oddur enn fremur.
„Það er mjög ánægjulegt að geta þétt okkar ágætu samvinnu enn frekar. Við munum leggja allt okkar kapp á að gæði, hollusta og ferskleiki skili sér á disk neytenda. Á pakkningum Ísfugls geta neytendur séð frá hvaða búi varan kemur, allt okkar kjöt, ferskt og óunnið er rekjanlegt til bónda,” segir Jón Magnús Jónsson, bóndi og framkvæmdastjóri Ísfugls.
