Aðalmeðferð fyrir Landsrétti í Gufunesmálinu hefur staðið yfir frá því á miðvikudag og lýkur í dag. Í gær, fimmtudag, flutti Hrafnhildur M. Gunnarsdóttir saksóknari málið fyrir hönd ákæruvaldsins. Krafðist hann ýmist þyngri dóma eða sömu dóma og féllu í héraðsdómi í málinu.
Eins og flestir vita varðar málið hrottalegt morð þriggja ungra manna á Hjörleifi Hauki Guðmundssyni, 65 ára manni frá Þorlákshöfn, þann 11. mars árið 2025. Hjörleifur lést eftir mikla misþyrmingar.
Þeir Stefán Blackburn og Lúkas Geir Ingvarsson hlutu báðir 17 ára fangelsi fyrir sinn hlut í málinu í héraðsdómi. Saksóknarinn krefst þess að þeir dómar verði óbreyttir. Hann fer hins vegar fram á að dómur yfir Matthíasi Birni Erlingssyni, sem fékk 14 ára dóm í héraði, verði þyngdur upp í 16 ára fangelsi.
Matthías hefur staðfastlega neitað því að hafa beitt Hjörleif ofbeldi þó að hann hafi verið á vettvangi þar sem voðaverkið var framið. Í ákæru málsins eru ólíkt hinum tveimur aðalsakborningunum engar lýsingar á beinu ofbeldi Matthíasar í garð Hjörleifs. Í vitnaleiðslum í Landsrétti á miðvikudag hélt Lúkas Geir því hins vegar fram að Matthías hefði barið Hjörleif með tjakki sem hann hafði meðferðis í bíl sínum.
Matthías hafnaði í vitnaleiðslum í gær þessum fullyrðingum Lúkasar en engin lífsýni fundust á umræddum bíltjakki. Matthas tjáði dómnum að hann hefði ekki beitt tjakknum en tjakkur hafi verið í bílnum vegna þess að tveim dögum áður hafi hann skipt um dekk.
Stúlka, sem ákærð var fyrir hlutdeild í ráni og frelsissviptingu með því að setja sig í samband við Hjörleif heitinn og vísa honum út í bíl til Stefáns og Lúkasar, fyrir utan heimili hans í Þorlákshöfn, var sýknuð í héraðsdómi. Saksóknari fer fram á að Landsréttur sakfelli stúlkuna og dæmi hana til refsingar, enda hafi henni mátt vera ljóst hvað var í vændum.
Ungur maður fékk í héraðsdómi tveggja ára skilorðsbundinn dóm fyrir að taka við fjármunum af reikningi Hjörleifs og senda áfram. Saksóknari fer fram á að sá dómur standi.
Landsréttur mun kveða upp sinn dóm í málinu eftir um það bil fjórar vikur.
