Samkvæmt dómskjölum sem sjónvarpsstöðin KFOR hefur undir höndum gekk Victor Lee Hawkins, 20 ára fyrrverandi nemandi, inn í skólann þann 7. apríl síðastliðinn með tvær hlaðnar hálfsjálfvirkar skammbyssur.
Hann skipaði fólki að leggjast á gólfið og reyndi að skjóta nemanda, en árásin mistókst þegar byssan sem hann ætlaði að nota stóð á sér. Í kjölfarið skaut hann að öðrum nemanda en hitti ekki.
Þegar nemendur tóku til fótanna hljóp skólastjórinn, Kirk Moore, í átt að skothríðinni. Hann ruddist inn í anddyri skólans og stökk á Hawkins, náði skammbyssu úr hendi hans og hélt honum niðri þar til aðstoðarskólastjórinn kom til hjálpar. Saman héldu þeir árásarmanninum niðri þar til lögregla mætti á vettvang.
Moore, sem er sextugur, hlaut skotsár á hægri fótlegg í átökunum. Hann hefur síðan verið útskrifaður af sjúkrahúsi og er á batavegi.
Hawkins mun hafa sagt lögreglu að hann hefði stolið byssum föður síns og ekið bíl hans að skólanum. Hann sagðist hafa viljað framkvæma „sína eigin skotárás í skóla í anda Columbine“ og að Moore hefði verið sérstakt skotmark þar sem honum hefði ekki líkað við hann.
Columbine-skotárásin er ein alræmdasta skotárásin í sögu Bandaríkjanna, en hún átti sér stað í apríl 1999 þegar tveir nemendur skutu 14 manns til bana í samnefndum skóla.
Lögreglustjórinn í Pauls Valley, Don May, segir við NBC News að skjót viðbrögð Moore hafi komið í veg fyrir stórfelldan harmleik.
„Ég efast ekki eitt augnablik um að hann hafi bjargað lífi barnanna,“ sagði May.
