53 ára ítölsk kona hefur verið dæmd í fjögurra ára fangelsi fyrir að hafa byrlað samstarfskonu sinni róandi lyf í níu mánuði. Hún setti lyfið í kaffi konunnar á degi hverjum. Ástæðan er að konan hafði heyrt orðróm um að grípa ætti til uppsagna hjá fyrirtækinu og því ákvað hún að gera hina konuna sljóa svo hún gæti ekki sinnt starfi sínu vel. Þær sinntu samskonar verkefnum hjá fyrirtækinu sem er tryggingafyrirtæki.

Samkvæmt frétt Sky News störfuðu konurnar í bænum Bra sem er sunnan við Tórínó. Hin dæmda tók að sér að færa samstarfsfólki sínu kaffi á hverjum morgni. Hún nýtti tækifærið til að setja róandi lyf út í kaffi samstarfskonunnar. Lyf þetta er notað gegn kvíða eða sem svefnlyf.

Fórnarlambið fann fyrir áhrifum lyfsins. Eftir að hún ók á tré fór hana að gruna að eitthvað óeðlilegt væri á seyði. Þegar hin konan hvatti hana til að drekka kaffi og sagði: „Hversu mikið getur það skaðað þig?“ komst upp um hana. Að auki höfðu náðst myndir af henni að setja lyfið út í kaffið.

Konan neitaði sök og hefur áfrýjað dómnum. Fyrir dómi kom fram að fyrirtækið hafði ekki í hyggju að segja fólki upp.