Fyrrum embættismaður í Rússlandi skrifaði grein í skjóli nafnleyndar sem birtist á dögunum hjá Economist. Þar tekur embættismaðurinn fram að Rússar séu farnir að horfast í augu við það að forseti þeirra, Vladimir Pútín, hafi leitt þjóð sína í ógöngur. Samkvæmt embættismanninum megi einkum lesa þetta úr breyttri orðræðu annarra embættismanna, sveitastjórnarmanna og aðila atvinnulífsins sem segi nú „hann“ í staðinn fyrir „við“ þegar rætt er um Pútín og störf hans.

„Kaldhæðnin er sú að Pútín hóf þetta stríð til að viðhalda valdinu og kerfinu sem hann bjó til. En nú, í fyrsta sinn síðan átökin hófust, eru Rússar farnir að sjá fyrir sér framtíð án hans [Pútíns].“

Rússar munu vera orðnir þreyttir á ástandinu. Manntjónið í stríðinu sé gríðarlegt og efnahagurinn kominn að þolmörkum. Rússar glíma við háa verðbólgu, hærri skatta, innviði í niðurníslu, ritskoðun og gífurlega íþyngjandi takmarkanir á frelsi. Það sem meira er þá virðist elítan í Rússlandi vera komin með nóg. Það er búið að banna efnaelítunni að búa erlendis. Önnur Vesturlönd hafa snúið baki við henni og getur elítan því ekki nýtt sér regluverk annarra vestrænna ríkja til að viðhalda og vernda auð sinn.

Fyrrverandi embættismaðurinn áætlar að rússneska ríkið hafi gert upptækar eignir að verðmæti um 60 milljarða bandaríkjadala frá kaupsýslumönnum undanfarin þrjú ár, annaðhvort með því að þjóðnýta eignir þeirra með beinum hætti eða með því að endurúthluta þeim til vildarvina.

„Það er ekki svo að elítan hafi allt í einu komist upp á bragðið hvað varðar réttarríkið og lýðræðið. En meira að segja þeir sem eru hliðhollir stjórnvöldum þrá reglur og stofnanir sem geta leyst úr ágreiningi með sanngjörnum hætti,“ skrifar embættismaðurinn og bætir við að á sama tíma hafi hallað verulega undan fæti hvað varðar hina geópólitísku heimsmynd sem byggði á alþjóðlegum lögum og reglum. Rússar kunnu vel á þá heimsmynd sem var en eiga erfitt með að fóta sig eftir breytingarnar. Áður hafi þeir notfært sér stofnanir eins og Öryggisráð Sameinuðu þjóðanna en geti það ekki lengur. Hnignun Vesturlanda þýði að Rússar séu nú komnir í sjálfsmyndarkreppu.

Samfélagssáttmáli Rússa, þar sem borgarar fengu að njóta einkalífs svo lengi sem þeir héldu sig frá stjórnmálum, er hruninn og í stað þess að bjóða upp á þjónustu, þægindi og neyslu bjóða stjórnvöld upp á kúgun, afskiptasemi og ritskoðun.

„Kerfið heldur svo lengi sem Pútín er við völd. En hver einasta tilraun hans til að varðveita og auka þetta vald flýtir fyrir niðurbroti þess“

Vinsældir Pútíns, sem hafa gjarnan verið miklar samkvæmt skoðanakönnunum, hafa dalað töluvert það sem af er ári eða úr 77,8% í byrjun árs niður í 65,6% samkvæmt mælingu ríkisgreiningarstofnunarinnar VTsIOM.

Sjá einnig:Pútín situr fastur í Úkraínu og óróinn vex heima fyrir