Andréa, sem býr til skiptis í London og Amsterdam, hefur safnað yfir 475 þúsund fylgjendum á Instagram þar sem hún deilir með fylgjendum sínum upplýsingum um æfingar sínar, mataræði og ráðleggingum um heilbrigðan lífsstíl.
Hún segir lykilinn að árangrinum vera sambland af miklum sjálfsaga, reglulegri þjálfun og próteinríku mataræði.
Í frétt Daily Star segir Andréa að hún framkvæmi 200 hnébeygjur á hverjum degi auk þess að stunda styrktaræfingar þar sem áherslan er á kjarnavöðvana í kviðnum og bakinu.
Fram kemur að fólk eigi erfitt með að trúa því að hún sé orðin 56 ára, enda í betra formi en flestar yngri konur.
Árangurinn hefur ekki aðeins skilað henni vinsældum á netinu heldur einnig umtalsverðum tekjum. Samkvæmt henni sjálfri þénar hún um 10 þúsund pund á mánuði, um 1,6 milljónir króna, í gegnum ýmis verkefni sem tengjast líkamsrækt og samfélagsmiðlum.
Andréa býður einnig upp á einkatíma á netinu þar sem hún sýnir æfingar gegn greiðslu. Hún segir marga aðdáendur hafa sýnt henni mikinn stuðning, bæði með gjöfum og fjárhagslegri aðstoð.
„Í fyrsta sinn í langan tíma finnst mér fólk meta ekki bara útlitið mitt heldur líka alla vinnuna og fórnirnar sem liggja að baki,“ segir hún.
Hún segir að áhuginn á sterkum og vöðvastæltum konum hafi aukist á undanförnum árum og að hún hafi fundið sinn sess í samfélagi fólks sem kann að meta þann lífsstíl.
Andréa segist vilja hvetja fólk á öllum aldri til að hugsa betur um heilsuna og minnir á að aldur þarf ekki að vera hindrun þegar kemur að líkamsrækt og vellíðan.
„Margir halda að lífið breytist eftir fimmtugt. Ég vil sýna að það getur í raun verið rétt að byrja,“ segir hún.
