Búið er að reka Southampton úr umspili ensku B-deildarinnar fyrir njósnir á æfingasvæði Middlesbrough í aðdraganda undanúrslitaeinvígis liðanna. Boro tekur sæti þeirra í úrslitaleiknum gegn Hull.

Málið hefur vakið mikla athygli, en Southampton var með útsendara að fylgjast með æfingu Boro þann 7. maí. Liðið vann svo tveggja leikja einvígi liðanna og tryggði sér sæti í úrslitaleiknum um sæti í ensku úrvalsdeildinni gegn Hull á Wembley.

Boro hafði hins vegar tilkynnt málið til ensku deildarinnar sem tók það fyrir. Stranglega bannað er að fylgjast með æfingu andstæðings innan við 72 klukkustundum fyrir leik.

Southampton játaði samkvæmt tilkynningu deildarinnar að hafa gerst brotlegt í þó nokkrum liðum í málinu. Niðurstaðan er sem áður segir, auk þess sem Dýrlingarnir byrja með fjögur stig í mínus í B-deildinni á næstu leiktíð.

Það verða því Hull og Middlesbrough sem mætast í úrslitaleik um sæti í deild þeirra bestu á laugardag. Hull, sem hafnaði í sjötta sæti deildarinnar, sló Millwall, sem endaði í þriðja sæti, óvænt út í undanúrslitunum.