Anthony Pollio, 33 ára, var einn á göngu í Glacier þjóðgarðinum í Montana þegar hann hvarf skyndilega. Hann var í tveggja vikna ferð og var alvanur útivistar- og göngumaður.

Talið er að björn hafi orðið honum að bana í þjóðgarðinum. Rétt áður en það gerðist skildi Pollio eftir skilaboð í talhólfi föður síns.

People skýrir frá þessu og segir að Pollio hafi hringt í föður sinn þegar hann var að ganga eftir göngustíg í þjóðgarðinum. Hann hafi skilið eftir skilaboð um að hann elskaði föður sinn.

Nokkrum dögum síðar fannst lík hans á afskekktu gróðurvöxnu svæði.

Pollio ætlaði að ganga að Mount Fire Lookout og hafði skýrt frá áætlun sinni, um að ljúka við að ganga leiðina, áður en hann hvarf.

Eftir að ættingjar hans tilkynntu að hann væri horfinn, hófst leit að honum í þjóðgarðinum. Lík hans fannst um 50 metra frá Mount Brown gönguleiðinni.

Í tilkynningu frá þjóðgarðinum segir að verið sé að rannsaka málið en grunur leiki á að bjarndýr hafi orðið Pollio að bana. Einnig kemur fram að sönnunargögn bendi til að árásin hafi komið Pollio mjög á óvart. Áverkar á líkinu er sagðir líkjast áverkum eftir bjarndýr.

Ef rétt reynist að bjarndýr hafi orðið Pollio að bana, þá er það fyrsta banvæna bjarndýraárásin í þjóðgarðinum síðan 1998.