Óháð ástæðunni þá er allt annað en þægilegt að vakna með höfuðverk. Sem betur fer eru til ráð til að koma í veg fyrir þetta.
Vertu meðvitaður um koffínneysluna – Koffín getur bæði linað höfuðverk og valdið höfuðverk. Hæfilegt magn getur dregið úr verkjum yfir daginn en ef maður drekkur of mikið koffín en fær ekkert eftir nætursvefn, þá getur maður fengið svokallaðan „fráhvarfs-höfuðverk“.
Aðeins 200 mg af koffíni á dag, það svarar til um tveggja bolla, geta valdið höfuðverk ef maður hættir svo snögglega að drekka það.
„Þegar það vantar skyndilega koffín, víkka æðarnar í heilanum og það getur valdið höfuðverk að morgni. Til að koma í veg fyrir þetta ætti maður stig af stigi að draga úr koffínneyslunni í nokkrar vikur,“ sagði Rhiannon Lambert, næringarfræðingur, í samtali við The Times.
Ef einkennin halda áfram að gera vart við sig, er rétt að hafa samband við lækni.
Haltu reglulegum svefnryþma – Hollensk rannsókn sýndi að 40% af þeim, sem þjást af mígreni, upplifa að höfuðverkjaköstin byrja á morgnana, oft á milli klukkan 4 og 9. Þetta bendir til tengsla við náttúrulegs dægurryþma líkamans.
Neil Stanley, svefnsérfræðingur, segir að meira að segja smávegis truflanir á svefnrútínunni geti valdið höfuðverk.
„Of lítill svefn, næturvinna, ferðaþreyta eð að sofa lengi um helgar getur valdið mígreni á morgnana. Reyndu að vera með fasta hátta- og vinnutíma,“ sagði hann.
Aukning á magni stresshormónsins kortísól á morgnana getur einnig valdið höfuðverk.
Íhugaðu að nota bitvörn – Að gnísta tönnum eða spenna kjálkavöðvana er algeng orsök höfuðverks að morgni að sögn Nigel Carter, tannlæknis. Margir vita ekki að þeir gera þetta en ástæðan fyrir þessu er oft stress, kvíði eða breytingar á tönnunum.
Hann sagði að stundum þurfi að laga bitið og geti bitvörn komið að gagni ef hún er notuð á nóttunni.
