Í Taranto á Ítalíu er mikið atvinnuleysi og höfnin þar hefur átt á brattann að sækja undanfarin ár vegna síminnkandi skipaumferðar. En í sumar lagðist skipið „Nicolas“ þar að bryggju og þótti koma þess góð tíðindi. „Þetta er vendipunkturinn og nú hefjast komur fragtskipa á nýjan leik,“ sagði hafnarstjórinn við þetta tækifæri og þakkaði tyrkneska fyrirtækinu Yilport Holding fyrir fjárfestingar þess í höfninni. Samkvæmt áætlunum fyrirtækisins á höfnin að verða ein af perlum Miðjarðarhafsins.

En Adam var ekki lengi í Paradís því skömmu síðar byrjuðu ítalskir fjölmiðlar að skýra frá því að Yilport Holding eigi í nánu samstarfi við kínverska fyrirtækið Cosco og að annað kínverskt fyrirtæki sé að reyna að sösla stóru svæði í kringum höfnina undir sig.

Höfnin er nú orðin hluti af stóru pólitísku deilumáli. Mike Pompeo, utanríkisráðherra Bandaríkjanna, var nýlega á Ítalíu og ræddi við Giuseppe Conte, forsætisráðherra, og Luigi di Maio, utanríkisráðherra, og gerði þeim ljóst að það sé varasamt að eiga í viðskiptum við Kínverja. Þetta kemur fram í tilkynningu frá bandaríska utanríkisráðuneytinu.

„Kínverjar fjárfesta á Ítalíu til að tryggja eigin hagsmuni,“

sagði Pompeo á fréttamannafundi þar sem hann varaði við samstarfi við Kínverja.

„Íhugið alvarlega hvaða þýðingu þetta hefur fyrir þjóðaröryggi,“

sagði hann.

Þjóðaröryggisnefnd ítalska þingsins hefur nú þegar óskað eftir áhættumati frá leyniþjónustunni varðandi málið. Raffaele Volpi, formaður nefndarinnar, sagði í samtali við La Repubblica að hann hafi áhyggjur af að Kínverjar séu að sölsa undir sig mikilvægum innviðum á Ítalíu.

Taranto er heimahöfn ítalska flotans og ein af höfnum NATO. Herskipahöfnin er skammt frá kaupskipahöfninni sem Kínverjar eru að reyna að komast yfir.