Þrátt fyrir að margir telji að gengið hafi verið á milli bols og höfuðs á hryðjuverkasamtökunum sem kenna sig við Íslamska ríkið (IS) eru þau enn að í Sýrlandi og Írak. Staða þeirra hefur þó breyst nokkuð þar sem þau eiga nú í vök að verjast og ráða eiginlega ekki yfir neinum landsvæðum að því að heitið getur. Einnig eiga samtökin nú orðið erfitt með að fá fólk til að fórna sér í sjálfsvígsárásum. En samtökin hafa nú fundið nýja aðferð til slíkra árása.

Nýlega gerðu samtökin árás í bænum Diyala í Írak. Eins og yfirleitt var árásinn ætlað að drepa fólk og valda ringulreið. Samtökin hafa á undanförnum vikum gert reglulegar árásir á bæinn en síðasta árásin var með alveg nýjum hætti.

Tvær kýr, sem búið var að koma sprengiefni fyrir á, voru reknar inn í bæinn og ráfuðu þar um þar til þær komu að varðstöð íraskra öryggisveita. Liðsmenn þeirra áttuðu sig á hættunni og skutu kýrnar að sögn Independent. Sprengjurnar sprungu við það og særðist einn óbreyttur borgari.

Samkvæmt frét New York Times hefur IS misst svo marga liðsmenn að nú er orðið erfitt að fá einhverja til að fórna sér til sjálfsvígsárása og því hafa kýr verið teknar til verksins. Samtökin hafa áður notað asna til slíkra árása en ekki er vitað til að kýr hafi áður komið við sögu.