Flugfélagið hefur verið vel rekið og þykir mjög öruggt. Mörgum hefur þótt það gott dæmi um ris Afríku sem heimsálfu. Flugfélagið er eina flugfélagið í álfunni sem er rekið með hagnaði og hefur verið einhverskonar táknmynd lands sem er að hrista af sér áratugalanga ímynd mikillar fátæktar og hungurs.
Muhammadu Buhari, forseti Nígeríu, sagði á sunnudaginn að slysið hefði ekki getað komið á verri tíma fyrir Ethiopian Airlines. Hann hafi verið stoltur af flugfélaginu sem hafi verið gott merki um þann góða árangur sem hefur náðst í Afríku.
Með fjármögnun frá Kína hafa Eþíópíumenn fjárfest mikið í innviðum landsins og iðnaði. Hagvöxturinn þar í landi hefur verið einn sá mesti í Afríku. Neðanjarðarlestarkerfi hefur verið byggt, vatnsaflsvirkjun við Níl og ýmis verkefni hafa verið í gangi til að tryggja landinu, sem á ekki land að sjó, aðgengi að Rauða hafinu.
