Margir Evrópubúar eiga erfitt með að átta sig á þeim áhrifum sem það mun hafa ef Rússar sigra í stríðinu í Úkraínu. Það mun hafa í för með sér að Vladímír Pútín mun fá enn meiri áhuga á að ráðast á fleiri Evrópuríki.

Þetta sagði Richard Moore, sem var yfirmaður bresku leyniþjónustunnar MI6 þar til nýlega, í samtali við Børsen.

Hann sagði að eftir fjögurra ára stríð í Úkraínu sé lítið eftir í Rússlandi annað en hervald. Vald sem Pútín einblíni á að nota til að sigra í stríðinu.

Þrátt fyrir að stríðið sé forgangsatriði hjá Pútín, þá telur Moore að Pútín leggi meiri áherslu á að halda völdum en stríðið.

„Þetta þýðir að ef við getum beitt Pútín þrýstingi sem fær hann til að finnast sem honum sé ógnað, þá er hann kannski ekki alveg jafn staðfastur og við höldum,“ sagði Moore.

En ef það á að ógna völdum hans af alvöru þá þarf að styðja gríðarlega mikið við Úkraínu, bæði hernaðarlega og efnahagslega. Slíkur stuðningur getur að lokum endað með árásum Úkraínumanna langt inni í Rússlandi og það getur ógnað völdum Pútíns að mati Moore.

En ef þessi staða kæmi upp, þá væri hún vandmeðfarin því þetta yrði „algjör niðurlæging“ fyrir Pútín og því ástæða til að óttast hvernig Pútín myndi bregðast við.