Hlutverkaleikur getur verið bæði skemmtilegur og skynsamlegur í margvíslegu samhengi. Til dæmis fyrir atvinnuviðtal, fyrir erfitt samtal og áður en fjölskyldufaðirinn deyr.

Það síðastnefnda er að minnsta kosti það sem norski milljarðamæringurinn Stein Erik Hagen, sem stofnaði matvöruverslanakeðjuna Rimi, gerði áður en hann lést.

Hann lést nýlega af völdum hjartaáfalls.

Í samtali við Dagbladet sagðist hann hafa boðað börnin sín fjögur heim til sín til að spila leikinn „Pabbi dó í gær“. Þetta gerði hann til að undirbúa þau undir framtíðina.

„Ég vildi sitja á hliðarlínunni á meðan börnin ræddu hvað þau vildu gera. Ég er ekki að tala um útför og þess háttar, heldur viðskipti,“ sagði hann.

Hann sagðist hafa talið skynsamlegt að ræða um þetta áður en einhver fjölskyldumeðlimur myndi deyja.

„Hvernig á að standa að útförinni, hvernig á að skipta eignunum, hver á að gera hvað og hver á að taka við hverju. Ég held að þessi æfing eigi vel við í fjölskyldunni minni, sérstaklega þar sem það er þegar búið að skipta hlutunum, þrátt fyrir að skiptin séu ójöfn.“

Börnin hans fjögur fá ekki jafn mikið í arf. Næstelsta barnið, Caroline Marie Hagen, fær „meira en hin“ sagði Hagen. Ástæðan er að hún var eina barnið sem hafði áhuga á fyrirtækjarekstrinum. „Hin eru ekki arflaus,“ sagði hann einnig.

Hagen lét eftir sig auðæfi sem eru metin á sem svarar til um 285 milljarða íslenskra króna.