Kona um fimmtugt hefur verið sakfelld fyrir manndráp, tilraun til manndráps og stórfellt brot í nánu sambandi fyrir að hafa orðið sex ára gömlum syni sínum að bana á heimili þeirra að Nýbýlavegi, aðfaranótt 31. janúar 2024.

Dómurinn var kveðinn upp í Héraðsdómi Reykjaness í morgun. Hann hefur ekki verið birtur á vefsíðu dómstólanna en Karl Ingi Vilbergsson, saksóknari hjá embætti Héraðssaksóknara, staðfesti þetta í samtali við DV. Samkvæmt upplýsingum frá Héraðsdómi Reykjaness liggur ekki fyrir hvenær dómurinn verður birtur.

Móðirin var dæmd í 18 ára fangelsi. Hún var sakfelld fyrir manndráp gagnvart yngri syni sínum og fyrir manndrápstilraun gagnvart 11 ára gömlum bróður hans.

Móðirin bar við ósakhæfi vegna andlegs ástands á verknaðarstundu, en matsmenn mátu hana sakhæfa.

Samkvæmt ákæru svipti konan son sinn lífi með því að setja kodda yfir andlit hans, þar sem hann lá sofandi í sófa, þrýsta með báðum höndum á koddann fyrir vit drengsins, og þrýsta á háls hans og efri hluta brjóstkassa. Linaði hún ekki tökin fyrr hún hún varð þess áskynja að drengurinn var látinn, en hann lést af völdum köfnunar.

Síðan fór hún inn í svefnherbergi þar sem eldri bróðir drengsins svaf, tók fyrir vit hans með annarri hendi og í hnakka hans með hinni og þrýsti andlitinu í rúmið, þannig að drengurinn náði ekki andanum. Drengurinn vaknaði við atlöguna og gat losað sig úr taki móður sinnar.

Gerðar voru einkaréttarkröfur af hálfu ættingja sonanna upp á tíu milljónir króna. DV hefur ekki upplýsingar um niðurstöðu varðandi bætur en sem fyrr segir liggur ekki fyrir hvenær dómur í málinu verður birtur.

Fréttinni hefur verið breytt.