Fljótlega eftir að Elon Musk keypti Twitter rak hann um helming starfsfólks samfélagsmiðilsins vinsæla og boðaði ýmsar breytingar. En starfsfólkið, sem ekki var sagt upp, er ekki sátt og í gær sögðu mörg hundruð þeirra upp störfum að sögn The New York Times.

Musk er sagður hafa fundað að undanförnu með mörgu starfsfólki að undanförnu, starfsfólki sem hann telur „mjög mikilvægt“. Hefur nánasta samstarfsfólk hans tekið þátt í þessum viðræðum sem miða að því að reyna að koma í veg fyrir að starfsfólkið yfirgefi Twitter.

Musk hefur sagt starfsfólkinu að það verði að leggja mjög hart að sér til að ná árangri og til að Twitter nái árangri.

Í nótt skýrði BBC síðan frá því að Musk hafi nú lokað skrifstofum Twitter þar til á mánudaginn. Fær starfsfólkið ekki að mæta á skrifstofur sínar fyrr en þá. Segir BBC að engin ástæða hafi verið gefin fyrir þessu en tilkynnt var um lokunina eftir uppsagnir starfsfólksins.