Uppsetning framleiðslulínu Gosfélagsins er í fullum gangi. Í tilkynningu frá félaginu kemur fram að verið er að setja upp tvær framleiðslulínur í drykkjarvöru en vélarnar sem notaðar verða til framleiðslunnar komu til landsins fyrir helgi. Stefnt er að því að framleiðsla á Klaka í plastflöskum hefjist um mánaðamótin maí-júní en framleiðsla á Klaka í dós mánuði síðar.

„Gosfélagið tók yfir sölu og dreifingu á Klaka og Djúsí klaka síðastliðið haust og nú er svo komið að Klaki í tveggja lítra plastflöskum er uppseldur. Nægar birgðir eru af Klaka í dós. Það styttist hins vegar verulega í að við getum aftur boðið upp á Klaka í nýjum, umhverfisvænni plastflöskum en áður, segir Brynjar Freyr Valsteinsson, framkvæmdastjóri Gosfélagsins.

Gosfélagið er nýr íslenskur framleiðandi sem byggir á góðum grunni, eins og segir í tilkynningunni. Félagið er á lokametrunum eð að koma upp 2.000 fermetra aðstöðu í Hafnarfirði og vatnið sem notað er í drykkina kemur úr Kaldárbotnum, sem eru með hreinustu vatnslindum landsins. Eins og er eru aðeins tvö fyrirtæki á Íslandi sem framleiða íslenska gosdrykki og nú bætist Gosfélagið við þá flóru.

„Við ætlum að verða leiðandi í framleiðslu óáfengra drykkja. Klaki hefur notið vaxandi vinsælda meðal Íslendinga undanfarin ár enda drykkirnir ferskir og svalandi. Með nýju framleiðslulínunni tryggjum við gæði og öryggi vörunnar en afkastagetan verður um 70 milljón lítrar á ári. Framleiðslan á Klaka er fyrsta skrefið en í framtíðinni stefnum við á að auka við hana og kynna til sögunnar nýja og spennandi drykki,“ segir Brynjar.

Það eru þeir Brynjar Freyr Valsteinsson og Kristján Elvar Guðlaugsson sem standa að baki Gosfélaginu ásamt fjárfestunum Ásgeiri Johansen og Lofti Bjarna Gíslasyni. Brynjar Freyr og Kristján Elvar þekkja vel til drykkjaframleiðslu á Íslandi en þeir þekkja dagvörumarkaðinn mjög vel og hafa yfir 20 ára reynslu á því sviði.