Fjórir lögreglumenn voru skotnir í Texas í nótt að íslenskum tíma. Lögreglan í Houston, stærstu borg ríkisins, skýrði frá þessu á Twitter. Fram kemur að til skotbardaga hafi komið er fíkniefnalögreglumenn voru að bregðast við tilkynningu um meinta heróínsölu. Skotið var á þá þegar þeir reyndu að komast inn í húsið en dómari hafði gefið út húsleitarheimild.

Tveir lögreglumenn eru í lífshættu en ástand tveggja er stöðugt. Annar hinna lífshættulega særðu var fluttur með þyrlu á sjúkrahús. Báðir hinir lífshættulega særðu lögreglumenn eru nú á skurðarborðinu en þeir voru báðir skotnir í hnakkann.

Skotbardaginn átti sér stað í húsi í austurhluta Houston. Lögreglumenn hafa unnið að því í nótt að kanna hvort byssumaðurinn hafi átt sér samverkamenn og hvort þeir leynist í húsinu.

Á fréttamannafundi lögreglunnar nú undir morgun að íslenskum tíma kom fram að lögreglan hafi ekki enn farið inn í umrædda íbúð en hafi sent vélmenni inn til að kanna aðstæður því ekki sé ljóst hvort fleiri vopnaðir menn séu þar inni. Myndir frá vélmenninu sýna að tveir menn eru látnir í íbúðinni og er ekki annað að sjá en þeir hafi fallið fyrir skotum lögreglumanna.