Framtíð Alisson Becker hjá Liverpool gæti verið í uppnámi ef marka má nýjustu fréttir frá Ítalíu.

Samkvæmt Gazzetta dello Sport hyggst hinn 33 ára gamli brasilíski markvörður ræða við nýjan knattspyrnustjóra Liverpool og óska eftir því að fá að yfirgefa Anfield í sumar til að ganga í raðir Juventus.

Alisson hefur verið einn mikilvægasti leikmaður Liverpool frá komu sinni árið 2018 og átt stóran þátt í þeim titlum sem félagið hefur unnið á undanförnum árum, þar á meðal Meistaradeildinni og ensku úrvalsdeildinni.

Juventus hefur verið að leita að nýjum markverði  og lítur á Alisson sem draumakost. Reynsla hans, leiðtogahæfileikar og gæði á milli stanganna gera hann að einu eftirsóttasta nafni á markaðnum.

Liverpool hefur hins vegar nýlega gefið út að félagið vilji halda Brasilíumanninum áfram og líti á hann sem lykilmann í uppbyggingu liðsins fyrir næsta tímabil.

Ef fréttirnar reynast réttar gæti skapast áhugaverð staða á Anfield þar sem Alisson þarf annað hvort að sannfæra forráðamenn félagsins um að samþykkja sölu eða halda áfram í rauðu treyjunni.