Tonda Eckert, knattspyrnustjóri Southampton, hefur í fyrsta sinn tjáð sig opinberlega um njósnahneykslið sem varð til þess að félaginu var vikið úr umspili ensku B-deildarinnar.

Southampton var vísað úr umspilinu og dæmt til að hefja næsta tímabil með fjögur stig í mínus eftir að hafa viðurkennt brot á reglum deildarinnar vegna njósna um andstæðinga.

Rannsókn var hrint af stað eftir að Middlesbrough kvartaði yfir því að starfsmaður Southampton hefði fylgst með æfingu liðsins fyrir undanúrslitaeinvígi liðanna.

A personal message from Head Coach, Tonda Eckert. pic.twitter.com/dHlDdF6XFd

— Southampton FC (@SouthamptonFC) June 2, 2026

Í myndbandi sem birt var á miðlum félagsins biður Eckert stuðningsmenn, leikmenn og önnur félög afsökunar og sagðist bera fulla ábyrgð á málinu.

Hann sagði að slíkar aðferðir hefðu verið algengar þar sem hann starfaði áður á Ítalíu og vísaði jafnframt til þess að æfingar liða í Þýskalandi hefðu oft verið undir smásjá andstæðinga.

Eckert lagði þó áherslu á að hann væri ekki að reyna að afsaka gjörðir sínar heldur útskýra bakgrunn málsins. Hann viðurkenndi að hann hefði átt að þekkja reglur ensku deildarinnar betur.

„Ég er ungur þjálfari, ég gerði mistök og tek fulla ábyrgð,“ sagði Eckert, sem kvaðst vona að stuðningsmenn félagsins gætu með tímanum fyrirgefið honum.

Samkvæmt fréttum sögðu yngri starfsmenn Southampton fyrir óháðri aganefnd að Eckert hefði sett mikinn þrýsting á þá til að njósna um andstæðinga.

Southampton áfrýjaði bæði brottvísuninni úr umspilinu og stigafrádrættinum, en án árangurs.

Hér að ofan má horfa á afsökunarbeiðni Eckert í heild.