

Bernardo Silva virðist vera á leið til Barcelona eftir farsælan feril hjá Manchester City ef marka má nýjustu fréttir frá Spáni.
AS greinir frá því að portúgalski miðjumaðurinn sé við það að skrifa undir tveggja ára samning við katalónska stórliðið. Silva, sem er 31 árs gamall, hefur verið orðaður við Barcelona um árabil og virðist draumaflutningurinn nú loksins vera að verða að veruleika.
Samkvæmt fréttinni vill Silva að félagaskiptin verði staðfest opinberlega fyrir lok vikunnar. Hann kemur frítt frá Manchester City.
Silva gekk til liðs við City frá Monaco árið 2017 og hefur síðan verið einn af lykilmönnum liðsins. Hann hefur unnið sex Englandsmeistaratitla, Meistaradeild Evrópu og fjölda annarra bikara með félaginu.