Real Madrid er sagt íhuga stórt tilboð í Declan Rice eftir að lykilmenn innan leikmannaráðningarteymis félagsins hafa mælt eindregið með kaupum á enska landsliðsmanninum.

Samkvæmt Teamtalk hafa áhrifamiklir aðilar innan spænska stórveldisins verið sérstaklega hrifnir af frammistöðu Rice með Arsenal á síðustu misserum. Þar er meðal annars vísað til leiðtogahæfileika hans, líkamlegs styrks og tæknilegra gæða sem hafi vakið athygli á Santiago Bernabéu.

Rice hefur verið einn mikilvægasti leikmaður Arsenal síðan hann kom frá West Ham og átti stóran þátt í því að Gunners urðu enskir meistarar á nýliðnu tímabili.

Real Madrid er talið vilja styrkja miðjuna fyrir næstu ár og sér félagið Rice sem leikmann sem geti orðið lykilmaður til lengri tíma.

Arsenal hefur hins vegar engan áhuga á að missa einn af sínum mikilvægustu leikmönnum og óvíst er hvort Lundúnafélagið myndi yfirhöfuð íhuga tilboð í hann.

Rice er 27 ára gamall og hefur fest sig í sessi sem einn besti miðjumaður heims. Ef Real Madrid ákveður að gera formlega atlögu að honum gæti það orðið eitt stærsta félagaskiptamál næsta sumars.