Tveir af stærstu leikmönnum Manchester City hafa neitað að útiloka brottför frá félaginu í sumar og segja framtíð sína verða ákveðna eftir Heimsmeistaramótið.

Bæði Josko Gvardiol og Rodri hafa verið orðaðir við önnur stórfélög á síðustu vikum á sama tíma og Manchester City gengur í gegnum miklar breytingar eftir að Pep Guardiola lét af störfum eftir tíu ár við stjórnvölinn. Enzo Maresca er nú talinn líklegastur til að taka við liðinu.

Gvardiol, sem hefur verið sterklega orðaður við nokkur evrópsk stórlið, sagði að hann væri ánægður hjá City en vildi ekki gefa afgerandi svar um framtíð sína.

„Við höfum öll séð sögusagnirnar. Ég er hamingjusamur hjá Manchester City og hef allt sem ég þarf. Eftir Heimsmeistaramótið sjáum við hvað gerist,“ sagði króatíski varnarmaðurinn.

Rodri tók í svipaðan streng þegar hann var spurður út í áhuga Real Madrid.

„Þetta er hluti af fótboltanum. Ég einbeiti mér að landsliðinu og að vera leiðtogi þar. Við sjáum hvað gerist eftir Heimsmeistaramótið,“ sagði Spánverjinn.

Brottför Bernardo Silva og John Stones hefur þegar markað upphaf nýs tímabils hjá City og því gæti frekara mannfall haft veruleg áhrif á uppbyggingu liðsins.

Gvardiol hefur leikið 122 leiki fyrir City frá komu sinni árið 2023, á meðan Rodri hefur verið einn mikilvægasti leikmaður félagsins undanfarin ár og vann Gullknöttinn árið 2024.

Framtíð þeirra beggja verður því eitt af stærstu umræðuefnum sumarsins á Etihad.