Hálfgerðar óeirðir brutust út víða í Evrópu og Bandaríkjunum um helgina þegar þúsundir manna flykktust í verslanir svissneska úraframleiðandans Swatch til að freista þess að ná í eintak af nýju úri sem framleitt er í takmörkuðu upplagi.

Úrið sem um ræðir, Royal Pop, er framleitt í samstarfi við lúxusúraframleiðandann Audamars Piguet.

Erlendir miðlar, AFP og Daily Mail, greina frá því að loka hafi þurft fjölda verslana vegna troðnings, slagsmála og átaka á milli viðskiptavina og öryggisvarða.

Var lögregla kölluð út í borgum á borð við Manchester, Birmingham, Cardiff, London, París og Mílanó þar sem mikill mannfjöldi safnaðist saman fyrir utan verslanirnar

Úrin eru sem fyrr segir seld í takmörkuðu magni á um 335 pund, jafnvirði rúmlega 58 þúsund íslenskra króna. Mikill endursölumarkaður hefur þó skapast í kringum vöruna og hafa sum úr verið auglýst á allt að hálfa milljón króna á netinu.

Myndbönd sem birtust á samfélagsmiðlum sýna fólk ryðjast inn í verslanir, ýta öðrum frá og slást í röðum sem mynduðust utan við verslanirnar. Í Manchester var tilkynnt um slagsmál í Trafford Centre verslunarmiðstöðinni og í París beitti lögregla táragasi til að dreifa um 300 manna hópi sem safnast hafði saman fyrir utan verslun Swatch. Þá voru einnig tilkynnt átök í Mílanó á Ítalíu og einn var handtekinn í Cardiff.

Swatch brást við með því að loka hluta verslana sinna tímabundið í Bretlandi, Evrópu og Bandaríkjunum. Fyrirtækið hvatti viðskiptavini til að sýna ró og minnti á að úrin yrðu áfram í sölu næstu mánuði, þrátt fyrir takmarkað magn í fyrstu sendingum.

Þetta er ekki í fyrsta sinn sem samstarfsverkefni Swatch og lúxusúraframleiðenda valda miklum æsingi. Langar biðraðir og endursölubrask var til dæmis áberandi í tengslum við samstarf fyrirtækisins við Omega og Blancpain.

Meðfylgjandi er myndband frá Daily Mail: