Mikael Nikulásson fyrrum þjálfari KFA og sérfræðingur Þungavigtarinnar skilur ekki af hverju umtalið í kringum Breiðablik er orðið svona lítið.

Breiðablik er með tólf stig í Bestu deild karla eftir sjö leiki en liðið tapaði sínum fyrsta leik í sumar gegn Val í gær.

Ólafur Ingi Skúlason er á sínu fyrsta heila tímabili með Breiðablik en liðið er sjö stigum frá toppsætinu núna eftir sjö umferðir.

„Er Ólafur Ingi með frípassa? Hermann Hreiðarsson er búinn að fá algjöran lestur fá fyrsta degi. Halldór Árnason fékk lestur sem þjálfari Breiðabliks í fyrra í þáttunum, hvað er að frétta af Breiðablik? Hefur enginn áhuga á Breiðablik lengur?,“ sagði Mikael í Þungavigtinni.

Mikael segir að fyrrum þjálfarar Breiðabliks hafi setið undir meiri gagnrýni en Ólafur í starfi.

„Það höfðu allir áhuga á Breiðablik þegar Óskar Hrafn og Halldór voru þjálfarar. Þeir eiga að vera með færri en þessi 12 stig sem þeir eru með.“

„Það er enginn að tala um Breiðablik, það er eins og þetta sé dáið. Ólafur Ingi sést varla, gefur ekkert af sér í viðtölum. Þeir spila hundleiðinlegan fótbolta, heppnir að vinna Skagann og eiga að tapa gegn Víking í fyrst umferð. Besti leikurinn er gegn Þrótti í bikarnum. Breiðablik á að vera með svona átta stig í þessari deild.“

Breiðablik er með tólf stig líkt og Valur en Mikael horfir öðruvísi á hlutina þar. „Hermann er að gera frábæra með hluti með Val.“