Japanski bílaframleiðandinn Honda varð fyrir talsverðu áfalli á síðasta rekstrarári þegar félagið tapaði 2,7 milljörðum dala, jafnvirði rúmlega 370 milljarða íslenskra króna.

Þetta er í fyrsta sinn sem fyrirtækið skilar tapi síðan það var skráð á hlutabréfamarkað í Tókýó árið 1957.

Í uppgjöri félagsins kemur fram að tapreksturinn megi að stórum hluta rekja til umfangsmikilla breytinga á rafbílaáætlunum fyrirtækisins, en félagið ákvað á síðasta ári að draga úr metnaðarfullri stefnu sinni í rafbílavæðingu.

Undanfarin ár hafði fyrirtækið lagt mikla áherslu á að ná forskoti á rafbílamarkaði og stefndi að því að allt vöruframboð þess yrði annaðhvort rafmagns- eða vetnisknúið fyrir árið 2040.

Í frétt New York Times kemur fram að til að ná því markmiði fjárfesti félagið milljörðum dala í þróun nýrra rafbíla, bæði sjálfstætt og í samstarfi við General Motors og Sony.

Honda ætlaði sér meðal annars að keppa við fyrirtæki á borð við Tesla og kínverska bílaframleiðandann BYD, sem hafa sótt hratt fram á rafbílamarkaði undanfarin ár.

Á sama tíma fóru aðrir japanskir framleiðendur, þar á meðal Toyota, hægari og varfærnari leið með áframhaldandi áherslu á tvinnbíla.

Eftirspurn eftir rafbílum hefur hins vegar minnkað nokkuð að undanförnu, sérstaklega í Bandaríkjunum sem er stærsti markaður Honda. Þar dróst rafbílasala saman um um fjögur prósent árið 2025 eftir mörg ár af samfelldum vexti.

Margir neytendur hafa enn áhyggjur af takmörkuðum hleðsluinnviðum og háu verði rafbíla. Þá höfðu breytingar á ríkisstyrkjum til rafbílakaupa í Bandaríkjunum einnig áhrif á markaðinn.

Í mars tilkynnti framkvæmdastjóri Honda, Toshihiro Mibe, að fyrirtækið hygðist hætta við þrjár nýjar rafbílagerðir sem þróaðar voru fyrir Norður-Ameríkumarkað. Þar á meðal voru ódýr rafbílalína í samstarfi við General Motors og hátæknibíll sem þróaður var með Sony.