Talibanar komu í gær á reglu í öngþveitinu fyrir utan flugvöllinn í Kabúl. Þeir fengu fólk til að fara í röð og halda henni með því að berja það með prikum og skjóta upp í loftið. Þeir segja að ástandið við flugvöllinn sé algjörlega á ábyrgð Bandaríkjamanna.

Talibanar hafa nú haft Kabúl á sínu valdi í um viku en Bandaríkjamenn hafa alþjóðaflugvöll borgarinnar á sínu valdi.

„Bandaríkin, með styrk sinn og búnað, hafa ekki getað komið á reglu við flugvöllinn. Það er friður um allt land nema á flugvellinum í Kabúl,“ sagði Amir Khan Mutaqi, talsmaður Talibana.

Reuters hafði eftir ónafngreindum heimildarmanni hjá NATO í gær að minnst 20 hafi látist í og við flugvöllinn síðustu sjö daga. Ekki er vitað hvað varð öllum að bana en vitað er að nokkrir tróðust eða krömdust til bana í mannþrönginni.

Fólk streymdi enn til flugvallarins í gær í von um að komast úr landi.

Talibanar komu upp röðum við flugvöllinn í gær með því að skjóta upp í loftið og berja fólk með prikum að sögn sjónarvotta. „Þetta hefur flýtt ferlinu,“ sagði James Heappey, varnarmálaráðherra Bretlands, í samtali við BBC.