Dyr, sem búið var að brjóta upp, og brotin rúða vöktu grun hjá lögreglunni um að eldri kona hefði verið myrt á heimili sínu á Orø í Danmörku. Konan fannst látin inni í húsinu og hafði greinilega ekki látist nýlega. En lögreglan vildi heldur ekki útiloka að sá eða þeir sem brutust inn hjá konunni hefðu orðið henni að bana. Umfangsmikil rannsókn hófst því þegar lík konunnar fannst þann 25. júlí síðastliðinn.

Niðurstöður krufningar lágu fyrir í gær og sýna að konan lést af eðlilegum orsökum í kjölfar bráðasjúkdóms. Réttarmeinafræðingar telja að margar vikur séu síðan hún lést.

Það var nágranni konunnar sem hafði samband við lögregluna því hann undraðist að bíll hennar hafði ekki verið hreyfður í langan tíma.

Grunur lögreglunnar beindist fljótlega að tveimur piltum, 14 og 16 ára, og að þeir hefðu brotist inn í húsið. Þeir viðurkenndu það þegar lögreglan ræddi við þá. Sögðust hafa brotist inn til að stela tómum flöskum sem þeir gætu selt fyrir skilagjaldið. Talsmaður lögreglunnar sagði í samtali við Ekstra Bladet að piltarnir hafi líklegast haft á tilfinningunni að eitthvað væri óeðlilegt í húsinu en hafi ekki áttað sig almennilega á því. Þeir sáu líkið ekki en var nokkuð brugðið við tíðindin.