Þetta átti að snúast um Donald Trump, Bandaríkjaforseta, en snerist heldur betur í höndunum á John Barnes, fyrrum knattspyrnumanni og goðsögn meðal aðdáenda Liverpool, sem varð sjálfur aðhlátursefnið.

Barnes, sem er orðinn 56 ára, ætlaði að gera grín að Trump á Twitter og birti mynd af forsetanum, sem á í vök að verjast þessa dagana vegna mótmæla almennings og heimsfaraldurs kórónuveiru og áhrifa hans á efnahagslífið og samfélagið allt.

Barnes birti myndina (skjáskot), sem er hér fyrir neðan, með textanum: „Þetta segir allt.“

Á myndinni eru Trump og móðir hans, Mary Anne Trump, og tilvitnun í hana:

„Já, hann er bjáni sem skortir almenna skynsemi og félagsfærni. En hann ER sonur minn. Ég vona bara að hann fari aldrei í stjórnmál. Hann væri hörmung.“

Barnes birti þetta en gleymdi að á skjáskotinu voru aðrar myndir, þar á meðal klámmyndir. Barnes neyddist því til að eyða tístinu og biðjast afsökunar.

„Ég verð að biðjast afsökunar á þessari móðgun sem ég átti hlut í þegar ég birti mynd, sem ég fékk senda frá vini mínum, með Donald Trump. Undir myndinni var klámmynd. Ég vissi það ekki og ég verð aftur að biðjast afsökunar ef þetta særði einhvern.“

Rétt er að taka fram að tilvitnunin í Mary Anne Trump er uppspuni eða eins og sonur hennar myndi segja: „Fake news.“